मानसिक आजार पूर्ण बरा होतो का?

काही आजार पूर्ण बरे होतात. काहींत औषध दीर्घकाळ घ्यावं लागतं, पण त्याबरोबर पूर्ण सामान्य आयुष्य जगता येतं. कोणता प्रकार आहे हे तपासणीनंतर डॉक्टर सांगू शकतात.

आमच्या घराण्यात कुणालाच नव्हतं. मग याला का?

अनुवंश हे अनेक कारणांपैकी एक आहे, एकमेव नाही. घरात कुणालाच नसतानाही आजार होऊ शकतो. आणि घरात कुणाला असला तरी होईलच असं नाही.

जास्त विचार केल्याने होतो का?

उलट आहे. जास्त विचार येणं हे बऱ्याचदा आजाराचं लक्षण असतं, कारण नाही.

मानसोपचारतज्ज्ञाकडे गेल्याचं इतरांना कळतं का?

वैद्यकीय माहिती गोपनीय असते. तुमच्या परवानगीशिवाय ती कुणाला दिली जात नाही.

लहान मुलांनाही होतो का?

होतो. लहान वयात लक्षणं वेगळी दिसतात — अभ्यासात लक्ष न लागणं, चिडचिड, शाळेत जायला नकार, झोप आणि जेवणातले बदल.